A asociación estudantil CES UVigo, dedicada ao deseño e construción de embarcacións propulsadas por enerxía solar, pon rumbo á competición co seu trimarán solar Boeiro I. Tras un período centrado no traballo interno e no desenvolvemento dunha maqueta a escala, o equipo afronta o novo curso con tres retos principais: volver á competición, poñer a punto o Boeiro I e seguir facendo medrar o equipo.
O Boeiro I, unha embarcación de seis metros de eslora deseñada e construída polo propio equipo, xa competiu no Monaco Energy Boat Challenge en 2024, converténdose no primeiro equipo español en participar na categoría Solar. Agora, a embarcación será sometida a diferentes modificacións, incluíndo unha nova distribución das placas solares e novos sistemas para os foils, melloras destinadas a preparar o proxecto para a seguinte fase.
A construción dunha maqueta a escala do Boeiro I durante o curso pasado permitiu ao equipo realizar probas e experimentar co comportamento da embarcación sen os recursos que implica mover o trimarán real. Esta ferramenta de experimentación foi clave para avanzar no desenvolvemento do proxecto antes de trasladar solucións á embarcación principal.
O equipo conta actualmente con 17 integrantes procedentes de diferentes escolas e ámbitos da UVigo, principalmente de Enxeñería Industrial e Enxeñería de Telecomunicación, pero tamén doutras titulacións e alumnado de máster. A asociación mantén aberta a porta a novas incorporacións ao longo de todo o ano, buscando persoas con "ganas de traballar e bo rollo".
A dirección do equipo está integrada por cinco persoas: presidencia, vicepresidencia, tesourería, secretaría e dirección técnica. A elección do calendario e o orzamento serán factores determinantes para decidir onde e cando volverán competir.
