A mostra, situada no primeiro piso do Edificio de Ferro e de acceso gratuíto, busca pór en valor as narrativas das mulleres sobre a súa experiencia migratoria e a transformación social a través da arte. Está comisariada polas investigadoras Iria Vázquez Silva e Alicia González Barreiro, do Grupo de Estudos en Traballo Social, Investigación e Transferencia (Gets-it) da Universidade de Vigo.
O proxecto, financiado inicialmente polo Instituto das Mulleres e desenvolvido polo colectivo investigador Mulleres á Fronte, presentou os resultados dun traballo de investigación e creación artística. A exposición no campus de Ourense conta co financiamento da Vicerreitoría de Investigación da Universidade de Vigo.
'Xénero e Migracións Caboverdianas' reúne imaxes de álbums familiares e fotografías de mulleres caboverdianas e descendentes residentes en Bembibre (Castela e León) e Burela (Galicia). A través de obradoiros de fotografía, as participantes capturaron escenas da súa vida cotiá e exploraron as relacións entre os coidados e o traballo.
As fotografías, acompañadas de textos das propias protagonistas, ofrecen unha perspectiva única sobre a evolución dos patróns de coidados a través das xeracións e os ciclos de vida familiar. A organización agradece a colaboración da Asociación Cultural Amilcar Cabral e do Ayuntamiento de Bembibre.
