O proxecto BlueWWater, coordinado polo CETMAR, presentou hoxe en Vigo os seus avances na mellora da calidade da auga, a detección e redución de contaminantes emerxentes e microplásticos. A iniciativa, desenvolvida durante tres anos en colaboración con entidades de Galicia e o norte de Portugal, busca mellorar as ferramentas de tratamento e concienciar á cidadanía.
Entre os principais resultados atópase o desenvolvemento de métodos para analizar ata 95 compostos indicadores e o refinamento das técnicas de mostraxe e análise de microplásticos en augas residuais e superficiais. Ademais, realizouse unha comparación entre 12 laboratorios de España e Portugal para mellorar a fiabilidade das medicións.
O proxecto tamén analizou a capacidade dos sistemas de tratamento de augas residuais para eliminar compostos orgánicos e inorgánicos, estudando mostras en oito plantas de tratamento e augas fluviais e costeiras. Avaliáronse tecnoloxías avanzadas e realizáronse ensaios para estudar a reutilización da auga tratada en cultivos.
A avaliación de risco ambiental incluíu ensaios con microalgas, larvas de ourizo de mar e peixe cebra para determinar a toxicidade das mostras de auga tratada. Tamén se desenvolveron modelos para simular a dispersión de contaminantes no río Miño.
No ámbito da educación ambiental, BlueWWater desenvolveu xogos educativos, vídeos, exposicións e obradoiros para concienciar sobre os residuos plásticos e contaminantes emerxentes. A rede NOR-WATER, xurdida do proxecto, reúne a 68 entidades de España e Portugal.
O proxecto está financiado polo Programa de Cooperación Galicia-Norte de Portugal 2021-2027 (POCTEP) e conta coa participación de diversas institucións como o iARCUS da Universidade de Santiago de Compostela, a Axencia INTECMAR, a Universidade do Porto, o IEO-CSIC, o CIIMAR e a Fundación CETAQUA, entre outras.
