As publicacións en acceso aberto, que son aquelas dispoñibles en internet sen restricións e respectando a autoría orixinal, reciben un 27% máis de citas que a media de contidos similares. Este dato, publicado pola Área de Servizos Bibliométricos da Biblioteca Universitaria da UVigo no seu informe anual, sitúa o impacto normalizado destas publicacións en 1,27, superando o 1,09 do total de documentos da institución no mesmo período (2016-2025).
As áreas científicas con maior porcentaxe de publicacións en acceso aberto son Ciencias da Terra (72,31%), Física (70,53%) e Química (68,21%). O informe tamén destaca as revistas nas que a UVigo publicou máis artigos en aberto neste período: Applied Sciences-Basel (157 artigos), Scientific Reports (132 artigos) e Foods (129 artigos).
Este informe anual, que se publica coincidindo coa Semana Internacional do Acceso Aberto, forma parte da estratexia impulsada pola Recomendación da Unesco sobre a Ciencia Aberta de 2021, á que se adheriron preto de 200 países para democratizar o coñecemento e aumentar o seu impacto social.
A edición de 2026 desta semana leva por lema O prezo do coñecemento, invitando á reflexión sobre o aumento dos custos de acceso e difusión da investigación, que van máis aló das subscricións e os cargos por procesamento de artigos, e inclúen o tempo e esforzo de autores e editores, así como a exclusión dunha parte da poboación mundial.
