A mostra, que estará aberta ao público ata o vindeiro 7 de maio na igrexa da Universidade de Santiago de Compostela (USC), articúlase arredor de dous eixos principais que, segundo a USC, “conviven e dialogan”. Por unha banda, preséntase a instalación Organismo, unha serie de autómatas deseñados para emular sons asociados ao mundo natural. Pola outra, exhíbense as Variacións miméticas, pezas musicais concibidas para órgano.

Estas composicións teñen a súa orixe en gravacións de campo realizadas en diversas localizacións, as cales foron transformadas en parámetros musicais e adaptadas ás características dun órgano construído por Manuel Sanz entre os anos 1800 e 1802, que se atopa precisamente na igrexa universitaria.

A exposición foi inaugurada polo propio artista sarriao nun acto ao que asistiron tamén a deputada provincial Natividad de Jesús González e a vicerreitora de Cultura, Lingua e Patrimonio, Ana Cabana. Esta última subliñou a capacidade da mostra para “escoitar o mundo de forma diferente”.

Organscape xorde da mímese musical da paisaxe sonora e afonda no estudo dos rexistros especiais que algúns órganos incluían para imitar sons paramusicais, como o canto dos paxaros. López explica que o obxectivo non é acadar unha imitación fiel, senón buscar o esbozo de certas características acústicas do material evocado, creando unha tensión entre a utopía e a distopía a partir dos nexos entre arte e tecnoloxía.

A mostra inclúe tamén outros traballos relacionados con Organscape, bocetos e obxectos do proceso creativo, así como unha selección de fondos da biblioteca da universidade compostelá vinculados ao proxecto. Esta iniciativa, creada por Xoán-Xil López en 2020 para a igrexa da USC na Praza de Mazarelos, regresa agora ás súas orixes tras incorporar novos elementos e ser exhibida en países como Austria, Suíza, Francia e Canadá. A exposición pode visitarse de martes a venres, en horario de 11:00 a 14:00 e de 17:00 a 20:30 horas.