As actividades formativas terán lugar os días 23 e 29 de abril, así como o 6 e 13 de maio, no primeiro andar da Praza de Abastos, en horario de 16:30 a 18:30 horas. A participación é de balde, pero o aforo é limitado, polo que se require inscrición previa a través do formulario habilitado ou chamando ao teléfono 886 21 30 15.

Os obradoiros combinan contidos teóricos e prácticos. Na parte formativa, abordaranse temas como a planificación dunha dieta equilibrada, a correcta selección e conservación dos alimentos, e o valor nutricional do peixe e o marisco. Posteriormente, os participantes poderán aplicar estes coñecementos na elaboración de receitas con produtos da ría de Pontevedra, co obxectivo de promover unha alimentación saudable, sostible e baseada no consumo de proximidade.

Esta iniciativa conta coa colaboración do Concello de Pontevedra e enmárcase na Estratexia de Desenvolvemento Local Participativo (EDLP) do Galp Ría de Pontevedra, aliñada cos obxectivos do Fondo Europeo Marítimo, de Pesca e de Acuicultura (FEMPA).

Paralelamente, o Galp Ría de Pontevedra avanza na avaliación intermedia da súa Estratexia de Desenvolvemento Local. Neste contexto, o vindeiro venres 24 de abril, ás 19:00 horas, celebrarase no Centro Social do Mar de Bueu o Foro de Avaliación Intermedia. Este encontro, aberto á cidadanía e aos axentes do territorio, busca recoller achegas e valorar o impacto das accións desenvolvidas entre 2023 e 2025, período no que se mobilizaron máis de 3 millóns de euros a través do FEMPA para proxectos de innovación e posta en valor do patrimonio mariñeiro.