A Xunta instala 22 paneis para alertar sobre o risco de inundacións nos ríos Lérez e Gafos

A sinalización busca concienciar á cidadanía sobre os perigos e as medidas preventivas en áreas de risco potencial significativo.

A Xunta instala 22 paneis para alertar sobre o risco de inundacións nos ríos Lérez e Gafos

Xunta de Galicia · 2026-11-18

A Consellería de Medio Ambiente e Cambio Climático, a través de Augas de Galicia, instalou 22 paneis informativos nos ríos Lérez e Gafos, ao seu paso por Pontevedra, para alertar sobre o risco de inundacións.

O obxectivo desta sinalización é concienciar á cidadanía sobre os perigos e implicacións asociadas a episodios de chuvia intensa, así como sobre as medidas preventivas e pautas de actuación recomendadas en caso de que estas chuvias se produzan en áreas de risco potencial significativo de inundación (Arpsi).
Segundo se recolle no Plan de Xestión de Risco de Inundación (PXRI) da Demarcación Hidrográfica Galicia-Costa, a Arpsi Río Lameira pertence ao grupo IV, que é aquel no que están incluídas as zonas fluviais con máis posibilidades de que se produzan desbordamentos.
A colocación destes elementos pretende mellorar a concienciación pública sobre a dinámica natural dos ríos e reforzar a seguridade e as medidas de protección á cidadanía. Trátase dun traballo enmarcado no Plan estratéxico de divulgación das áreas de risco potencial significativo de inundación (Pedarpsi) e que dá continuidade á instalación destes paneis noutras zonas sensibles de Galicia-Costa.
Augas de Galicia xa colocou este tipo de indicadores en 42 concellos con áreas de alto risco de inundación dentro do seu territorio, como Gondomar, Ames, Brión, Sanxenxo, Vilagarcía de Arousa, Carballo, A Coruña, Baiona, Santiago de Compostela, Vigo, entre outros.
O organismo hidráulico adoita sinalizar e combinar diferentes formatos e tipoloxías de carteis nas zonas, como os xerais, que inclúen información específica sobre a zona e o protocolo de actuación en caso de desbordamento, ou os infantís, cunha estética e linguaxe adaptadas á idade do público ao que van dirixidos.
Ademais, Augas de Galicia reforza deste xeito o compromiso coa prevención de eventuais asolagamentos, en estreita colaboración coas administracións locais e cumprindo co PXRI vixente ata 2027.
Información elaborada a partir da fonte oficial: Xunta de Galicia — Notas de prensa (portal central, cubre todas as consellerías) (18/11/2026)