O Museo de Pontevedra incorporou á súa exposición permanente unha peza de Castelao de gran interese dentro da súa produción artística. Trátase de ‘Home fumando (Retrato de Llamazares)’, un óleo sobre táboa datado arredor de 1908, o que a converte na obra máis antiga do artista presente nas salas do museo.
Esta obra, de 20,5 por 40,5 cm e asinada como A. Rodz. Castelao, mostra un retrato caricaturesco dun personaxe con gorra que acende un cigarro cun isqueiro sobre un fondo neutro. O ton humorístico e a pincelada solta lembran a outros cadros do mesmo ano, como os titulados ‘No faetón de Rianxo a Santiago’, que forman parte da colección Afundación.
O cadro foi depositado no Museo por Carmen Trillo Filgueira. Segundo a memoria familiar, o retratado é identificado como Llamazares, unha figura popular de Compostela durante os anos universitarios de Castelao, quen frecuentaba as tabernas e compartía bromas cos estudantes.
