A Policía Local de Ourense despregará un dispositivo especial para garantir a seguridade dos participantes nas dúas probas programadas. A carreira para persoas adultas comezará ás 10:30 horas, mentres que a proba infantil e inclusiva iniciarase ás 11:30 horas.

Os cortes e restricións de tráfico comezarán ás 08:30 horas co peche da Glorieta da Policía Nacional en dirección á avenida de Otero Pedrayo para a instalación da saída e a meta. O tráfico procedente da Ponte Nova cara ao centro desviarase pola rúa de Curros Enríquez. O que veña de Curros Enríquez en sentido de saída da cidade será desviado no cruce coa rúa de Celso Emilio Ferreiro, por esta mesma vía ou pola rúa de Sáenz Díez.

Posteriormente, ás 09:30 horas, procederase ao peche da rúa de Curros Enríquez e de todos os seus accesos. Finalmente, ás 10:00 horas, cortaranse o resto dos viais polos que transcorrerán as carreiras ata a súa finalización.

O percorrido da categoría adulta incluirá rúas como Curros Enríquez, Sáenz Díez, Praza de Concepción Arenal, Progreso, Bon Home, Xosé Ramón Fernández Oxea, rúa de Lugo, rúa do Vilar, praza da Ferrería, Cervantes, Barreira, Praza Maior, Lamas Carvajal, rúa do Paseo e o Parque de San Lázaro, regresando por Curros Enríquez ata a meta. A proba infantil e inclusiva desenvolverase nun circuíto máis curto entre a Glorieta da Policía Nacional, Curros Enríquez e o Parque de San Lázaro.