A experiencia no Palacio Ducal de Medinaceli marcou un fito para esta formación, dirixida por Raquel Carrera, quen destacou a importancia do certame como ferramenta de motivación para o alumnado.
“"Hoxe en día que é moi difícil que os rapaces se interesen por unha disciplina como a música clásica, quería motivalos, a que eles tiveran un obxectivo polo que traballar un pouquiño máis e poñerse a estudar. É verdade que temos un alumnado bastante bo, moi disciplinado pero non deixan de ser nenos e adolescentes."
O desafío de interpretar a última sinfonía de Haydn e unha peza de Emily Mayer implicou numerosas horas de traballo individual e colectivo. Este esforzo adicional tivo a súa recompensa, como sinalou un dos estudantes, quen resaltou que o traballo extra foi gratificante e que o violín lle achega tranquilidade fronte ao estrés.
Outro alumno, que toca viola e violonchelo, compartiu que, a pesar de ter entrado inicialmente obrigado ao Conservatorio, a música converteuse na súa paixón, decidindo continuar estudando e practicando ambos os instrumentos. O éxito acadado en Soria tamén contribuíu a fortalecer os lazos entre os membros da orquestra e a derrubar prexuízos sobre a música clásica.
“"Agora a xente cre que é aburrida pero non é así. Esta experiencia foi moi bonita porque tocas cos teus amigos."
Finalmente, unha estudante subliñou o papel do instrumento como refuxio, afirmando que en momentos difíciles o violín é un apoio fundamental. A orquestra retomou os seus ensaios coa satisfacción de ter superado a presión do xurado e a alegría do triunfo compartido.
