A Deputación da Coruña celebra o III Culturgal Expandido en Muros, convertendo a vila "no epicentro cultural da comarca" durante esta fin de semana. O Mercado Municipal será o escenario dunha programación gratuíta deseñada para todas as idades, que busca reflectir "a enerxía cultural de Muros".
Na presentación do evento, a deputada de Cultura da Deputación, Natividade González, sinalou que esta iniciativa é "un compromiso e unha aposta para ampliar o Culturgal ás vilas medianas", unha satisfacción que este ano recae en Muros.
A alcaldesa de Muros, María Lago, destacou a boa acollida da veciñanza á programación cultural anual e agradeceu á Deputación a elección de Muros para esta edición, afirmando que "seremos unha vez máis o epicentro cultural da comarca esta semana".
Caridad González, concelleira de Cultura, engadiu que o concello aposta pola cultura e que Muros ten un "tecido cultural forte", polo que augura un éxito para o Culturgal Expandido.
O director do Culturgal, Camilo Franco, explicou que a descentralización do evento responde á "enerxía cultural" de concellos como Muros e invitou á veciñanza a gozar da programación preparada.
A programación inclúe actividades para todas as idades, con artistas e creadores locais como o grupo Lisdexia e o escritor Samuel L. París. O venres 16 comezarán as actividades co autor teatral Candido Pazó, seguido do recital 'Todos poetas menos o capitán' de Samuel L. París e o concerto poético 'Cinta adhesiva' de Silvia Pena e Jesús Andrade.
O sábado pola mañá haberá programación infantil con 'O Lobo Feliz' de Miguel Guido e 'Menú de Contos' de Charo Pita. Pola tarde, unha conversa literaria con Marga Tojo, Diego Ameixeiras e Carlos Lixó, o concerto de Lisdexia e o espectáculo 'Da vara e mais da besta' con Lois Pérez e Secho.
O domingo estará dedicado ao baile tradicional cun obradoiro impartido polo bailarín e coreógrafo Artur Puga, que tamén pechará o evento co 'Ven e Baila' xunto a Os Enxebres, invitando a toda a veciñanza a participar.
