A reunión, celebrada hoxe, marca o inicio dunha rolda de encontros da Xunta de Galicia en todas as áreas de transporte metropolitano, co obxectivo de avaliar o funcionamento dos plans e analizar a evolución dos servizos xunto cos concellos. O encontro en Lugo é o primeiro dunha serie prevista ata finais de ano.
Previamente á xuntanza, os concellos recibiron un informe sobre a oferta actual de servizos en cada municipio para facilitar a análise do estado do transporte na área. Abordouse tamén a posibilidade de introducir cambios e modificacións para adaptar a oferta ás necesidades cambiantes da cidadanía.
A comisión de seguimento da ATM de Lugo está composta polos concellos de Baleira, Lugo, Friol, Outeiro de Rei, Rábade, Guntín, Castroverde, O Corgo e Castro de Rei. Estes municipios están conectados por unha rede de servizos que facilitan os desprazamentos cotiáns cara á capital provincial e entre os propios concellos da área.
Antes de que remate o ano, convocaranse tamén as comisións de seguimento das áreas de transporte metropolitano de Santiago de Compostela, Ferrol, A Coruña e Vigo.
