A iniciativa, que busca ofrecer ferramentas á cidadanía para identificar e combater as noticias falsas, xa pasou por localidades como Lugo, Barreiros, A Fonsagrada, Quiroga, Viveiro, Burela, Guitiriz, Castro de Rei, Pedrafita do Cebreiro, Monforte de Lemos, Taboada, Friol, Sarria e Chantada. O obxectivo é ensinar a identificar bulos, contrastar informacións, fomentar o pensamento crítico e promover un consumo responsable da información dixital.
A próxima sesión terá lugar este sábado, 21 de novembro, na Casa da Cultura de Trabada a partir das 12:00 horas. A xornalista Carmen Quintela impartirá este obradoiro gratuíto, que conta con 35 prazas e está aberto ao público.
Carmen Quintela, especializada en xornalismo con enfoque de xénero e coordinadora editorial da Agencia Ocote, achegará a súa experiencia, recoñecida con premios como o Gabo 2022. A xornalista recibiu formación específica en alfabetización mediática e tratamento das violencias machistas.
Tras a sesión de Trabada, o calendario continuará o 28 de novembro en Castroverde (Centro Sociocultural Paco Pestana, 12:00h) e o 12 de decembro en Cervantes (Edificio de Servizos Múltiples de San Román, 11:00h). Estas citas tamén son de acceso libre e gratuíto, con 35 prazas cada unha. Agárdanse novas datas en Lugo, Foz e Vilalba.
O Colexio de Xornalistas advirte de que a proliferación de noticias falsas dana o xornalismo e a memoria democrática, e sen ferramentas para defenderse, ninguén está libre de ser vítima ou propagador da desinformación. A iniciativa busca reforzar a capacidade cidadá para analizar criticamente contidos e distinguir información rigorosa de bulos.




