A formación popular denunciou que a Federación de Vecinos Lucus Augusti e a Asociación de Veciños, Comerciantes e Industriais de A Milagrosa recibiron esta cantidade, maioritariamente a través de axudas directas, durante a xestión do bipartito de PSOE e BNG na Deputación.
O portavoz popular na Deputación, Antonio Ameijide, vinculou este financiamento coa actitude dos directivos destes colectivos, aos que describiu como "hooligans" do PSOE. Segundo Ameijide, estes comportamentos, que incluíron insultos e lanzamento de moedas a unha concelleira, explícanse polo interese en manter as subvencións.
“"Non defenden os intereses dos lucenses, defenden a quen os financia para non perder a galiña dos ovos de ouro."
Ademais das axudas da Deputación, o PP suxire que estes colectivos tamén recibiron fondos do Concello e doutras asociacións ligadas á federación veciñal. O portavoz popular ironizou sobre unha pancarta exhibida no pleno, que facía referencia a "Judas" e "30 moedas", afirmando que os directivos se "venderon por unhas cantas moedas máis; en concreto, por 800.000, en menos dunha década".
O PP tamén criticou que dirixentes do PSOE e BNG cuestionen as axudas da Xunta a outras asociacións mentres obvian as recibidas pola federación veciñal da Deputación. Para a formación popular, é "lamentable" que se siga polarizando a sociedade lucense, sen "exemplos de xestión que dar" tras anos de goberno, e que só os defenda "os mercenarios dunha federación á que lle teñen pagado absolutamente todo".
