A intervención, que comezou o pasado luns, implicará o peche temporal da Casa dos Mosaicos entre o 19 e o 26 de outubro. Este peche permitirá executar as tarefas necesarias para solucionar os problemas de filtracións de auga detectados neste punto e mellorar as condicións de conservación dos restos arqueolóxicos.
Esta actuación enmárcase nun plan de mantemento regular das ventás arqueolóxicas da cidade. O Concello adxudicou un contrato específico por 12.100 euros para realizar tarefas periódicas de conservación, limpeza e reparación, tanto no interior como no exterior destas instalacións.
Ademais de abordar problemas concretos como as filtracións, o contrato permitirá atender de forma continuada as necesidades de mantemento destes espazos. Tamén se estudará un sistema de limpeza adaptado que evite o paso de vehículos sobre as ventás arqueolóxicas.
Con estas medidas, o Concello busca garantir unha atención máis regular e avanzar na conservación deste patrimonio histórico de Lugo.
