A Xunta de Goberno Local de Lugo deu luz verde aos proxectos e ao inicio da contratación de actuacións de mellora das infraestruturas viarias, cun orzamento base de licitación conxunto de 376.328,45 euros. Entre as actuacións destaca a urbanización parcial da rúa Virxe da Soidade, cun orzamento de 184.591,05 euros, pendente desde hai anos, que mellorará a accesibilidade e a seguridade peonil na contorna do colexio das Gándaras. O proxecto inclúe a construción dunha nova beirarrúa, a conexión peonil entre a Calzada das Gándaras e a rúa do Peto, unha plataforma para a parada do autobús urbano cunha nova marquesiña, e a reorganización de paradas e zonas de estacionamento.
Tamén se aprobaron proxectos de mellora de camiños rurais incluídos no Plan da Deputación de Cooperación cos Concellos 2026, que suman 191.737,40 euros. Un deles, cun orzamento de 124.318,43 euros, acondicionará o camiño que comunica o Concello de Outeiro de Rei coa N-640, nas proximidades dos Silgueiros (parroquia de Teixeiro), e o camiño que comunica Portoganoi, Verín e Pacios (parroquia de San Xoán do Campo). O segundo proxecto, con 67.418,97 euros, acondicionará o Camiño da Croa (treito Toiriz-Casas Novas, parroquia de Piúgos) e camiños no lugar de Taboelle (parroquia de Orbazai). Ambos os proxectos terán un prazo de execución de catro meses.
No ámbito das axudas sociais, aprobáronse as bases para organizacións non gobernamentais de desenvolvemento (ONGD) cun orzamento de 49.000 euros (40.000 para cooperación exterior e 9.000 para sensibilización social). Tamén se aprobaron as bases para axudas a asociacións veciñais sen ánimo de lucro, dotadas con 22.500 euros para actividades de interese social e gastos de mantemento, cunha contía máxima de 2.000 euros por asociación.
A Xunta de Goberno Local tamén aprobou a modificación do contrato de xestión do fondo de capital risco Lugo Transforma, a solicitude da xestora Torsa Capital. Redúcese o volume máximo de investimento de 13,002 millóns a 8 millóns de euros e o compromiso mínimo de investimento de 6 a 4 millóns. Torsa Capital xustifica esta redución polas circunstancias económicas e orzamentarias que afectaron o calendario de achegas municipais, así como pola configuración inicial do fondo, considerada sobredimensionada.
Respecto ao transporte urbano, estimouse parcialmente o recurso de Monbus Urbanos S.A.U. contra a prórroga forzosa do servizo. Mantense a obriga da empresa de continuar prestándoo, pero recoñécese a posibilidade de compensación económica polos custos derivados desta continuidade, que deberá xustificar e auditar o Concello. Iniciarase tamén a nova contratación do servizo.
No ámbito cultural, delegáronse competencias para axilizar o convenio coa Fundación ”la Caixa” para instalar a exposición itinerante Colores del Mundo na rúa San Fernando, composta por 42 imaxes de National Geographic, prevista entre o 26 de outubro e o 13 de decembro de 2026.
Aprobouse a atribución temporal de funcións da Xefatura de Sección de Atención Cidadá e a rectificación dun erro material na identificación dun membro do tribunal de probas físicas para bombeiro/a condutor/a. Ademais, adxudicouse a Naturgy Clientes Empresas, S.A.U. o contrato de subministración eléctrica do Concello de Lugo por un importe anual previsto de 9.465.094,21 euros sen IVE.
