A programación comezará ás 11:00 horas na Oficina de Turismo da Xunta de Galicia e no Espazo RelembrA coa sesión "X Cultura e Tradición no Camiño". Haberá obradoiros de ourivaría e iniciación ao tapiz, que tamén se repetirán pola tarde ás 17:00 horas, requirindo inscrición previa.
Pola tarde, ás 16:30 horas, a Praza de Santo Domingo acollerá "La Caixeta", un espectáculo teatral familiar que se prolongará ata as 20:30 horas. A montaxe narra unha historia de amor prohibido nun universo onde a música e a danza se entrelazan nunha gran caixa de música.
A música tamén será protagonista a partir das 17:00 horas co concerto de Soan no Patio do Edificio Administrativo do Concello, e co Festivaliño Xacobeo On The Road na Praza da Soidade, que ofrecerá proxeccións na súa pequena sala de cine ata as 20:00 horas.
A xornada continuará con concertos de Los Jorobados del Miño (18:30h, Patio do Edificio Administrativo), Los Indecisos (19:00h, Praza de Santa María) e Tambukda cun pasarrúas que percorrerá varias rúas da cidade. Tamén ás 19:00 horas, dentro de "X Cultura e Tradición no Camiño", actuará «As Cegas da Montaña».
Ás 19:30 horas, a Praza Maior vibrará coa verbena do Grupo Beatriz. Máis tarde, ás 20:00 horas, o Patio do Edificio Administrativo acollerá o concerto de Chemical Addicts, mentres que outros dous pasarrúas, Xaora e Son de Lugh, animarán os barrios das Fontiñas, Montirón e Albeiros.
A gran cita da noite será ás 21:00 horas na Praza de Santa María co espectáculo "San Froilán Sorrí", que contará co humor de David Amor e Carlos Blanco, dous referentes do humor galego coñecidos pola súa conexión co público.
A xornada festiva pecharase ás 21:30 horas con dúas propostas simultáneas: o concerto de Celtas Cortos na Horta do Seminario e a verbena coa orquestra Panorama City na praza Agro do Rolo.
