O director xeral de Cultura, Anxo M. Lorenzo, participou hoxe na apertura do XII Congreso Nacional de Bibliotecas Móbiles na Cidade da Cultura. A cita, que se celebrará ao longo desta fin de semana no Gaiás, acolle a máis de 80 profesionais de Galicia, Asturias, Castela e León, Cataluña, Castela-A Mancha, A Rioxa, Madrid, Navarra, Valencia e Portugal, conta tamén cunha mostra de furgotecas.
O representante da Consellería de Cultura, Lingua e Xuventude sinalou que as bibliotecas móbiles “constitúen un servizo público esencial para achegar a cultura á cidadanía, especialmente no rural”. Neste senso, puxo en valor as tres rutas de As Furgotecas que a Xunta puxo en marcha na zonas do rural de Lugo e Ourense en 30 municipios de menos de 20.000 habitantes “cun labor que vai máis aló do préstamo de libros e inclúe asesoramento lector, acompañamento dixital, formación e programación cultural”.
Anxo M. Lorenzo celebrou este tipo de encontros, que considerou fundamentais para “intercambiar experiencias e reflexionar en conxunto para avanzar no desenvolvemento dos servizos bibliotecarios itinerantes”. O programa inclúe relatorios, visitas e unha mesa redonda con especialistas de España e Portugal. Ademais, haberá unha visita guiada a unha mostra de furgotecas no aparcadoiro do Gaiás, así como unha exposición de bibliobuses en miniatura no vestíbulo do edificio CINC.
As Furgotecas son un servizo de bibliotecas móbiles que facilitan o acceso á lectura, á información e á aprendizaxe en localizacións que non dispoñen de infraestruturas propias. Presentes en 30 concellos das provincias de Lugo e Ourense, contan con tres vehículos que realizan rutas periódicas e suman preto de cen puntos de parada cada un. Desde a súa posta en marcha, rexistraron 72.284 préstamos e 59.125 visitas.
Este congreso coincide coa fin de semana do Día das Bibliotecas, que se celebra mañá, 24 de outubro. As entidades da rede pública da Xunta festexarán a efeméride con obradoiros, sesións de contancontos, concertos e agasallos. A Biblioteca de Galicia, na Cidade da Cultura, ofrecerá un obradoiro para crear minilibros ás 17,30 horas. A Biblioteca Pública Ánxel Casal, en Santiago, acollerá un concerto infantil ás 12,00 horas e entregará libros aos 'Superlectores'.
Outras bibliotecas tamén se suman á celebración: a Biblioteca Pública Miguel González Garcés, na Coruña, terá unha sesión de contacontos ás 12,00 horas; a Biblioteca Pública de Lugo presentará a peza teatral 'Contamos contos lobos?'; a Biblioteca Nós, en Ourense, ofrecerá un concerto de Paco Nogueiras; a Biblioteca Pública Antonio Odriozola, en Pontevedra, organizará o obradoiro 'Biblioteatro'; e a Biblioteca Juan Compañel, en Vigo, terá unha sesión de contacontos a cargo de Bea Campos.
