A delegada da Xunta en Ferrol, Martina Aneiros, visitou as instalacións para supervisar os traballos realizados grazas a unha subvención do Plan específico de acción comunitaria da Consellería de Presidencia, Xustiza e Deportes.
A entidade recibiu a axuda para executar o illamento acústico das portas entre espazos mediante paneis especiais e reforzo de vidro no salón de actos. Tamén se creou un espazo panelado para ocultar a zona de recollida selectiva de lixo e outro pechado para almacenamento de mobiliario.
Ademais, mellorouse o equipamento coa adquisición de novas cadeiras de oficina e pregables, un armario e unha pantalla LED de 75 polgadas.
Esta orde de axudas, dirixida a asociacións veciñais, de mulleres rurais e comunidades de usuarios de augas, busca apoiar o movemento veciñal para mellorar a convivencia e dinamizar a vida social e cultural en Galicia.
A convocatoria deste ano conta cunha dotación de 3 millóns de euros, repartidos en 2,6 millóns para obras e 400.000 euros para equipamento. As obras inclúen acondicionamento, reforma, ampliación, eliminación de barreiras arquitectónicas e melloras en estruturas, fachadas, cubertas, interiores, ventás, teitos, fontanería, climatización, saneamento ou electricidade.
No caso das traídas comunitarias, as obras céntranse en captacións, canalizacións e depósitos para reducir perdas de auga e mellorar a xestión, medición, control de calidade ou eficiencia enerxética.
O apoio ao equipamento facilita a adquisición de mobiliario, material informático ou equipamento acústico e audiovisual para o funcionamento das entidades e a organización de actividades.
