A delegada territorial de Ferrol, Martina Aneiros, participou esta mañá no IES Sofía Casanova, en Ferrol, nunha xornada formativa sobre reanimación cardiopulmonar (RCP) dirixida a 25 alumnos de 1º de Bacharelato. Esta iniciativa, promovida polas Consellerías de Sanidade e Educación, Ciencia, Universidades e FP, busca que todo o alumnado galego remate a ESO e o Bacharelato coa capacidade de recoñecer unha situación de risco vital.
O programa 'RCP na aula', pioneiro en España e desenvolvido nas aulas galegas desde 2016, forma e habilita aos docentes como monitores de soporte vital básico e instrutores do alumnado dentro do horario lectivo. Durante a sesión, os estudantes practicaron manobras de reanimación sobre un manequín ante unha posible parada cardiorrespiratoria.
“"O obxectivo é que todo o alumnado galego remate a ESO e o Bacharelato sabendo recoñecer unha situación de risco vital, alertar ao 061 e iniciar as manobras de reanimación ata a chegada dos servizos sanitarios, porque nestas situacións, cada minuto é vital para mellorar as posibilidades de supervivencia."
Aneiros tamén lembrou outras iniciativas da Xunta en resposta a emerxencias, como o programa Acude e axuda, que conta cun rexistro de persoas voluntarias formadas en soporte vital básico e manexo de desfibriladores. Ademais, a aplicación Sergas Móbil permite localizar os 3.692 desfibriladores externos semiautomáticos dispoñibles en Galicia, facilitando así unha resposta máis rápida ante paradas cardiorrespiratorias.
