Esta actuación estratéxica, cun orzamento de 1.160.706,09 euros e un prazo de execución de 13 meses, busca gañar espazo público e reforzar a unión entre a cidade e o mar. O proxecto contempla unha reorganización integral da zona, priorizando a mobilidade peonil e ciclista, ademais de mellorar os accesos desde o tecido urbano.

Un dos puntos clave é a rehabilitación do tramo do Camiño Inglés que discorre por esta área, co obxectivo de mellorar a súa accesibilidade e integración paisaxística. Entre o trazado do Camiño Inglés e a Avenida do Mar, configurarase un gran espazo multifuncional que incluirá zonas de xogos infantís con pavimento de caucho reciclado, áreas recreativas e deportivas, espazos de descanso e unha zona multiusos que funcionará como miradoiro e auditorio ao aire libre.

A iniciativa tamén prevé a creación de 74 novas prazas de aparcamento, distribuídas en dous novos estacionamentos: un na rúa Fonte da Greza con 24 prazas e outro nas inmediacións das rúas Telleiras e rúa 5 con 50 prazas, tres delas adaptadas para persoas con mobilidade reducida. Ademais, renovarase o aparcamento xa existente na parte traseira do auditorio, mellorando o seu pavimento, pintado e sinalización.

En canto á iluminación, instalarase nova luz nas zonas de aparcamento e no parque infantil, mentres que noutras áreas manterase unha iluminación limitada para preservar o carácter natural do litoral. Os pavimentos peonís executaranse con lousas fotocatalíticas descontaminantes, deseñadas para reducir os contaminantes do aire.

Esta obra forma parte dun convenio de colaboración entre o Concello de Ferrol e a Axencia Galega de Infraestruturas, que cofinancia o 50% do proxecto. Actualmente, xa se están executando outras fases do plan en Ferrol Vello, A Magdalena e Arsenal (cun investimento de 5,3 millóns de euros), así como a de Esteiro (con 2,7 millóns de euros).