O CITEEC, centro de innovación tecnolóxica en Edificación e Enxeñaría Civil da UDC, trasladou parte da súa actividade investigadora á Dársena da Marina na Coruña. Alí, persoas de todas as idades puideron descubrir e coñecer de preto os traballos que se desenvolven no centro.
A proposta “O mini-CITEEC sae á rúa” permitiu interactuar con reproducións a escala de máquinas e equipos de laboratorio. O persoal técnico e investigador explicou de forma práctica conceptos de enxeñaría civil.
O Grupo de Construción (gCONS) organizou o taller “Hormigón en familia”, onde os participantes elaboraron portafotos de morteiro mentres aprendían sobre materiais a base de cemento e liñas de investigación asociadas.
Pola súa banda, o Grupo de Química Analítica (QANAP) abordou a contaminación ambiental con sinxelos experimentos, mostrando como se estudan certos contaminantes e reflexionando sobre a súa presenza no día a día.
A xornada tamén ofreceu unha visita guiada ás instalacións do CITEEC, incluíndo o Túnel de Vento, a Dársena de Portos e Costas, e os Laboratorios de Hidráulica e Construción, onde se coñeceron ensaios e demostracións habituais.
A programación completouse con dúas charlas divulgativas na Dársena da Marina. O investigador Guillermo Lorenzo Gómez (GMNI) presentou avances en modelos matemáticos para o estudo do crecemento tumoral e a resposta terapéutica, centrados nos xemelgos dixitais de tumores. A investigadora Yolanda Pérez Sánchez (GRIPA) abordou en “As paisaxes nótanos miran” a relación entre cultura visual, paisaxe e a interpretación dos espazos.
