O Concello da Coruña vén de plantar esta mañá nos Cantóns unha nova aciñeira de oito metros de altura e 35 anos, que xa substitúe ao exemplar de metrosidero que non foi posible recuperar. Esta nova árbore, de sete anos máis ca anterior, súmase ás seis aciñeiras xa plantadas na rúa Alcalde Manuel Casás, así como a cinco carpes na rúa Santa Catalina e dúas máis que irán en Juana de Vega.
Ademais, xunto ao obelisco atópanse catro faias vermellas e, nas vindeiras semanas, completaranse as plantacións con novos exemplares vinculados á obra de reurbanización. Está previsto un gran exemplar de algarrobo na xardiñeira fronte á Fundación Barrié e un olmo na praza de Mina. Ao longo da nova beirarrúa de granito disporanse 12 loureiros en macetas de gran tamaño.
Con estas 32 novas árbores, os Cantóns pasan de ter só un exemplar a unha importante masa vexetal. A superficie de zonas verdes amplíase ata os 1.200 metros cadrados, cunha xardiñeira corrida de cen metros de lonxitude con flores e arbustos como glicinia, salvia, anénoma e rododendro.
A urbanización dos Cantóns tamén supón un importante reverdecemento da zona coa redución de case 10.000 metros cadrados de asfalto, substituído por beirarrúas ensanchadas de granito.
