O club de rugby CRAT da Coruña celebrou hoxe o seu 50º aniversario. No acto estiveron presentes a alcaldesa, Inés Rey, a concelleira de Benestar Social, Participación e Igualdade, Nereida Canosa, e o concelleiro de Deportes, Manuel Vázquez. A rexedora destacou a estreita colaboración do Concello coa entidade ao longo destas décadas para promover o deporte base e os valores solidarios.
Inés Rey sinalou que o Concello é "un fiel aliado deste equipo en todas as súas vertentes e versións" e comprometeu o apoio ao proxecto. Lembrou tamén a organización conxunta do Campionato de España de Rugby Inclusivo, "apostando unha vez máis polo deporte como ferramenta de inclusión, convivencia e transformación social".
A alcaldesa tamén eloxiou o momento actual do equipo sénior feminino, afirmando que "representan moi ben o carácter dunha cidade de primeira como A Coruña: inconformista, traballadora, orgullosa do que é e disposta a competir con calquera, sen complexos". Engadiu que "cando vemos estas xogadoras defender as cores do CRAT, vemos tamén unha parte do que somos como cidade. Vemos esforzo, talento, compromiso e unha enorme capacidade para superar as dificultades".
Durante o acto, tamén se lembrou ás figuras destacadas na historia do club desde a súa fundación en 1976, ligada á Escola de Arquitectura Técnica da Coruña. A alcaldesa rememorou a "persoas como Ignacio Lobón e tantos outros que puxeron as primeiras pedras deste bonito edificio conxunto", agradecendo o seu esforzo e cariño ao longo destas cinco décadas.
