O Estado confirmou que A Coruña, declarada zona tensionada, recibirá algo máis de 7 millóns de euros dos fondos estatais destinados a promover o acceso á vivenda. Esta cantidade é superior á inicialmente anunciada.
A alcaldesa, Inés Rey, insistiu hoxe na necesidade de que a Xunta transfira estes fondos ao Concello, a pesar de que a normativa estatal fixa que as comunidades autónomas sexan as receptoras directas.
Rey criticou a "oposición frontal" da Xunta á aplicación da lei de vivenda e á fixación de topes de prezos, unha medida que, segundo a alcaldesa, outras comunidades como Cataluña ou o País Vasco si están a aplicar.
A rexedora lembrou que o Concello impulsou a declaración de zona tensionada e presentou un plan de vivenda con actuacións para os próximos anos. "Para poder materializar estes plans precisamos os fondos estatais previstos", sinalou, engadindo que "non tería sentido que a Xunta se quedase con eses recursos" cando se opón á medida.
